Tadbirkorlar kredit olish jarayonida qiyinchiliklarga duch kelganda O’zbekiston Respublikasi Tadbirkorlik faoliyatini qo’llab quvvatlash Davlat jamg’armasiga murojaat qilishlari mumkin. Jamg’arma kafillik hamda kompensatsiya xizmatlarini taklif qiladi.
Kafillik bu — qarz oluvchining tijorat banki oldidagi o’z majburiyatlarini bajarishi uchun javob berish mas’uliyatini tadbirkorlik faoliyatini qo’llab-quvvatlash davlat jamg’armasiga (jamg’arma) yuklaydigan kafillik shartnomasi.
Jamg’arma tijorat banklarining kreditlari bo’yicha kredit summasining 50 foizigacha (50 foizi ham shu jumlaga kiradi) miqdorda, biroq 8 milliard so’mdan ortiq bo’lmagan miqdorda kafilliklar taqdim etadi.
Kafillik berilganligi uchun jamg’armaga qarz oluvchi tomonidan milliy valyutada kafillik summasining bir foizi miqdorida bir martalik vositachilik haqini to’laydi.
Kompensatsiya bu — tadbirkorlik sub’ektlariga tijorat banklari tomonidan ajratiladigan kreditlar bo’yicha kredit foiz stavkasining bir qismini qoplashdir.
Kompensasiya va kafillik xizmatlari quyidagi maqsadlardan tashqari barcha yo’nalishlarga beriladi:
❌ Ilgari olingan kreditlarni yoki istalgan boshqa qarzdorlikni qaytarish;
❌ Alkogolli va tamaki mahsulotlari ishlab chiqarish;
❌ Savdo-vositachilik tashkilotlari va umumiy ovqatlanish korxonalarining aylanma mablag’larini shakllantirish;
❌ Savdo ob’ektlari va umumiy ovqatlanish ob’ektlari qurilishini moliyalashtirish;
❌ Bankdan tashqari kredit tashkilotlari va lizing kompaniyalarining resurs bazasini shakllantirish;
❌ Tavakkalchilikka asoslangan qimor va boshqa o’yinlarni tashkil etish hamda shu maqsadlar uchun uskunalarni xarid qilish.