Rais nutqi

Spiker: Bahodir Umirshayxov

Assalomu alaykum aziz mehmonlar, hurmatli tadbirkorlar, ommaviy axborot vositalari xodimlari hamda uzog’-u yaqindan kelgan barcha mehmonlar!

O’zbekiston Oziq-ovqat sanoati uyushmasi ochilish marosimi hamda uning doirasida tashkil etilayotgan press-konferensiya dasturiga xush kelibsizlar!           

Barchamizga ma’lum, hozirgi paytda jahon bozoridagi talablardan kelib chiqqan holda eksportbop qishloq xoʻjaligi mahsulotlarini ishlab chiqarishga ustuvor vazifa sifatida qaralmoqda. Bu ishni amalga oshirish uchun oziq-ovqat sanoati bo’yicha xalqaro standartlarni o’rganish va faoliyatga tatbiq etish talablari tadbirkorlar hamda agromutaxassislar gardaniga qo’yilgan dolzarb vazifa bo’lib qolmoqda.

   Statistik ma’lumotlarga ko’ra, mamlakatimizda yiliga oʻrtacha 16 million tonnadan ortiq meva-sabzavot, poliz va dukkakli mahsulotlar, 1,5 million tonnaga yaqin goʻsht, 10 million tonnaga yaqin sut ishlab chiqarilmoqda. Biroq ularni sanoat usulida qayta ishlash darajasi oʻrtacha 15-20 foizni tashkil qilmoqda. Bu o’z-o’zidan respublikada  agrologistika tizimi yaxshi rivojlanmaganligi va mazkur yo’nalishda tizimli ishlarning amalga oshirilishi lozimligini tasdiqlaydi. Qolaversa, qishloq xoʻjaligi mahsulotlarini saqlash va saralash xizmatlari talab darajasida emasligi yetishtirilgan hosilning kamida 30 foizdan ziyodining isrof boʻlishiga olib kelmoqda. Ba’zan yetishtirilgan mahsulotlarni xalqaro standartlarga mos laboratoriya tekshiruvidan oʻtkazishda ham katta muammolar chiqib qolishini odamni abgor holga soladi. Bir gap bilan aytadigan bo’lsak, respublikamiz oziq-ovqat sanoati sohasida muammolar yetarlicha.

Mazkur kamchiliklarga o’rinli yechim topib, ularni bartaraf etishga yordam berish, yuqori sifatli oziq-ovqat mahsulotlariga bo’lgan ehtiyojlarni qondirish, iste’mol tovarlarining ommaviy tarzda ishlab chiqarilish samaradorligi va sohadagi mehnat unumdorligini oshirish, O‘zbekiston Respublikasi Prezidentining 2020-yil                           9-sentabrdagi PQ 4821-sonli qarorining amaliyotga tadbiq etilishiga ko‘maklashish hamda eksport-import faoliyati bilan shug‘ullanuvchi oziq-ovqat mahsulotlari ishlab chiqaruvchilarni mazkur qarorning ijrosini taʼminlashga kengroq jalb etish maqsadida 2020-yil 29-oktabr kuni Oʻzbekiston oziq-ovqat sanoati uyushmasi  tashkil etildi.

Aziz mehmonlar, keling, dastlab uyushmaning tarixiga to’xtalib o’tsam:

Uyushma o`z faoliyatini 2018-yil Qandolatchilik sanoati uyushmasi sifatida boshlagan. Uning tarkibida 200 dan ortiq tadbirkorlik subyektlari qamrab olingan. “Qandolatchilikni rivojlantirish uyushmasi” o’z a’zolariga ishlab chiqarilgan mahsulotlarni xorijiy bozorlarga olib chiqish, HALOL, GlobalGap kabi bir qancha xalqaro sertifikatlarni qo’lga kiritish, qandolatchilik faoliyatini yurituvchi tadbirkorlarga chetdan kerakli texnik asbob-uskunalarni keltirish va hamkorlar topishda ko’maklashgan. Mazkur sohada faoliyat yuritayotgan 100 dan ortiq ishbilarmon doira vakillariga ish jarayonida yuzaga kelgan muammolarni hal qilishda yordam bergan. Shuni alohida ta’kidlab o’tish lozimki,  2019-yil “Qandolatchilikni rivojlantirish uyushmasi” aʼzolari tomonidan mamlakatimizga     50 million AQSH dollaridan ortiq miqdordagi kapital investitsiyalar jalb qilingan.

Bir narsani alohida qayd etib o’tishni zarur, deb hisoblayman. Qandolatchilik uyushmasi tashkil etilishida “Mavis”, “Crember”, “Zebiniso ona”, “Sladus” hamda “Taste food” tashkilotlari faol ishtirok etishgan. Uyushmaga asos solinishida esa mana shu davrada o’tirgan “O’zbekiston Eksportchilari” uyushmasi raisi Muxtor aka Umarovning o’rinlari beqiyos. O’zlari barcha tashkiliy ishlarga o’zlari bosh-qosh bo’lganlar. Ularga uyushmamiz jamoasi nomidan o’z samimiy minnatdorchiligimizni bildirib o’tamiz.

Keyinchalik qandolatchilik sohasidan boshqa oziq-ovqat yo’nalishlari bo’yicha ham “Qandolatchilikni rivojlantirish” uyushmasiga ko’plab murojaatlar  kelib tushganligi sababli va oziq-ovqat sohasida faoliyat yurituvchi tadbirkorlik subyektlariga kattaroq masshtabda yaqindan yordam berish maqsadida O’zbekiston Oziq-ovqat sanoati uyushmasi tashkil etildi.

Ayni paytda uyushmaga rasmiy ro’yxatdan o’tgan a’zolar soni 50 tani tashkil etadi. Biroq uyushma jami 5450 dan tadbirkorlik subyektlarini o’z ichiga qamrab oladi.

O’zbekiston Oziq-ovqat sanoati uyushmasi o’z oldiga eng avvalo, Oziq-ovqat ishlab chiqaruvchilarini birlashtirishni maqsad qilib qo’ygan. Bunda bir maqsadli va bir muammoli tadbirkolarni bir-biri bilan uchrashtirish, faoliyatida yechim topilishi dolzarb bo’lib turgan tadbirkorlarga tayanch bo’lish ko’zda tutilgan.

Uyushmaning yana bir maqsadi mamlakatimiz tadbirkorlik sektori faoliyatini qo‘llab-quvvatlash hisoblanadi. Mazkur yo’nalishda mahalliy ishlab chiqaruvchi va mahsulot yetishtiruvchilarga xorijiy hamkorlar bilan aloqalar o’rnatish, ularning huquqiy va iqtisodiy havfsizligi hamda manfaatlarini himoya qilish, oziq-ovqat sanoati sohasida faoliyat yurituvchi xodimlarning malakalarini oshirish, sohaga yosh mutaxassislarni jalb etish, shuningdek, yo’nalishga doir yangi innovatsion texnologiyalar va ilmiy tadqiqotlarni amalda tadbiq etish ishlarini amalga oshirish belgilangan.

O’zbekiston Oziq-ovqat sanoati uyushmasining o’z oldiga qo’ygan bir qancha ustuvor vazifalari ham mavjud. Ulardan sirasiga mahsulotlarning xavfsizlik standartlariga muvofiqligini taʼminlash, xalqaro  xavfsizlik standartlariga javob beradigan mahsulotlarni ishlab chiqarish jaroyonlarini tadbirkorlarga o’rgatish, ishlab chiqaruvchilarni xalqaro va mahalliy sertifikat hamda hujjatlarni olishga tayyorlash, asosiy oziq-ovqat mahsulotlari zaxiralarini yaratishga ko’maklashish, import jarayonini takomillashtirish orqali oziq-ovqat mahsulotlariga bo’lgan ehtiyojni neytrallashtirish, narx-navolarning sun’iy tarzda keskin o’zgarishini oldini olish kabilar kiradi.

Uyushma tashkil etilganidan buyon shu kunga qadar tadbirkorlardan 500 dan ortiq murojaatlar kelib tushgan. (1-may holatiga ko’ra)

Ulardan,

  • yuridik xizmatlar ya’ni qonuniy himoya bo’yicha kelib tushgan arizalar – 5%;
  • umumiy xizmatlar va moliyaviy ko’mak bo’yicha murojaatlar – 15%;
  • marketing va reklama xizmatlari, xorijiy platformalarda e’lon berish bo’yicha murojaatlar – 10%;
  • standartlashtirish va sertifikatlash xizmatlari bo’yicha murojaatlar – 20%;
  • eksport xizmatlari ya’ni mahsulotni eksportga yo’naltirish bo’yicha murojaatlar – 35%;
  • bojxona xizmatlari: bojxona va yuklarni tashish masalalari bo’yicha murojaatlar – 15% ni tashkil etadi.

Endi esa qisqacha uyushmadagi ish jarayoni bilan tanishtirib o’taman:

  • Uyushmaga dastlab, tadbirkorlik subyektlaridan ariza va murojaatlar kelib tushadi;
  • So’ngra, murojaatlarning asl sabab va maqsadi o’rganib chiqiladi;
  • Masala tahlil etib chiqilganidan so’ng, uni hal qilish uchun tegishli tashkilotga murojaat qilinadi;
  • Bu vaqt orasida uyushma xodimlari murojaat yo’llagan shaxs yoki tashkilot bilan doimiy aloqada bo’lib turadi;
  • Murojaatchiga masalaga yechim bo’luvchi barcha keys va yechimlar taqdim etilib, uning ishi samarali tarzda hal bo’lishiga yordamlashiladi.

Bilasizmi, Azizlar!

Bugungi kunda oziq-ovqat mahsulotlarini yetishtirish, ishlab chiqarish va qayta ishlashda bir qancha o’z yechimiz topmay kelayotgan masalalar bor. Bularga misol sifatida,

  • Oziq-ovqat sanoati sohasida sifatli mahsulotlarning yetishmasligi;
  • Tadbirkorlar orasidagi ish jarayonlarida zarur bo’ladigan ko`nikma hamda malakalarning tanqisligi;
  • Qo`shimcha qiymat zanjirini yaratmasdan ish boshlash va faoliyatni davom ettira olmaslik;
  • Xalqaro bozorlarga chiqishda turli to`siqlarning yuzaga kelishi;
  • Korxonalarda moddiy-texnik bazaning takomillashtirilmaganligi;
  • Oziq-ovqat mahsulotlarini ishlab chiqarishda ishlatiladigan xom-ashyo narxlarining balandligi;
  • Korxonalarda huquqiy va moliyaviy masalalarning mavjudligi;
  • Eksport qilish uchun kerakli bo’lgan sertifikatlarni olish yo’llarini bilmaslik kabi masalalarni keltirishimiz mumkin.

Sohada mavjud kamchilik va masalalarni chuqur tahlil etgan holda O’zbekiston Oziq-ovqat sanoati uyushmasi bir qancha ishlarni amalga oshirdi. Jumladan,

  • Uyushma a’zolari hisoblangan tashkilotlar tomonidan ishlab chiqarilgan mahsulotlarning tovar belgilarini qalbakilashtirgan korxonalar aniqlandi va mazkur masala bo’yicha tashkilotlar o’rtasida biznes kelishuvlarni amalga oshirish orqali kelishmovchilik ijobiy hal qilindi;
  • Qandolatchilik fabrikalarida ishlatilishi zarur bo’lgan xomashyo mahsulotlarining narxini pasaytirgan holda ushbu yo’nalishda ishlab chiqarilgan mahsulotlar tannarxi ozaytirilib, eksport hajmini oshirish maqsadida Malayziyadan hamkor topilib, shartnomalar tuzildi;
  • Muzqaymoq mahsulotlari eksportining yaroqlilik muddati Oziq-ovqat sanoati uyushmasi ko’magida 2 oydan 1 yilga uzaytirildi;
  • Sut va sut mahsulotlari, shakar hamda qandolat mahsulotlarining qonuniy-normativ hujjatlarini ishlab chiqishda ishtirok etilib, uyushma tomonidan takliflar berildi;
  • Uyushma a’zolari uchun Amerikaga mahsulotlarni eksport qilishda zarur bo’lgan FDA sertifikati hamda mahsulotlar eksportini Yevropaga oshirishda muhim sanalgan CHDPP raqamlarini olib berishda ko’maklashildi;
  • Tadbirkorlarga turli kredit olishlarida yordamlashildi;
  • Go`sht va go`sht mahsulotlari eksportiga qo`yilgan ta`qiqlarini olib tashlashda Oziq-ovqat sanoati uyushmasi xodimlari tashabbuskor bo’lib, jarayonda faol ishtirok etishdi;
  • 7 tadan oshiq xalqaro ko’rgazmada mahalliy tadbirkorlarning ishtirok etishi ta’minlandi;
  • Shakardan aksiz solig’ini olib tashlash ishlarida uyushma xodimlari faol ishtirok etdi;
  • Tadbirkorga investitsiya mablag’larini qo’lga kiritishda yordam berildi;
  • Eng asosiysi, 3000 dan ortiq ishbilarmon doira vakillari samarali faoliyat yuritish maqsadida bir nuqtada jamlanishdi.

Shu o’rinda, uyushma tomonidan o’z a’zolariga ko’rsatiladigan xizmatlar haqida ham ma’lumot berib ketmoqchiman. Demak, O’zbekiston Oziq-ovqat sanoati uyushmasi xizmatlari quyidagilardan iborat:

  • Yuridik masalalarda tadbirkorlarda yordam ko`rsatish;
    • Korxonalarning moliyaviy ahvolini o`rganish, buxgalteriya, audit ishlari;
    • Korxonalar ish jarayonini standartlashtirish va ishlab chiqarilayotgan mahsulotlarga sertifikatlar olishda ko`maklashish;
    • Eksportdagi o’z yechimi topa olmayotgan masalalarda yordam berish;
    • Import masalalarida yo`l-yo`riq ko`rsatish;
    • Biznes treninglar, malaka oshirish kurslari, biznes diagnostikasini tashkil etish;
    • Bojxona hujjatlarini rasmiylashtirishda yordam berish;
    • Yangi loyihalar, grantlarni e`lon qilish va boshqa muammolarni hal qilishda ko`maklashish.

O’zbekiston Oziq-ovqat sanoati uyushmasi tomonidan bir qator xorijiy tashkilotlar bilan hamkorlikda quyidagi loyihalar amalga oshirilmoqda:

  • “Mutaxassislar tayyorlaydigan o‘quv markazlari va labaratoriyalar tashkil etish” loyihasi;
  • “Oziq –ovqat sanoati raqamli analitik markazi”;
  • “Dual ta`lim tizimi rivojlantirish” loyihasi.

Shuningdek, quyidagi loyihalarni amalga oshirish ustida hozirda ishlar qizg’in tarzda ketmoqda:

  • “O’zbekistonda Atlantik Losos balig’ini yetishtirish” loyihasi;
  • “Oziq-ovqat ishlab chiqaruvchilar shaharchasi” loyihasi;
  • “Aqlli datchik” loyihasi;
  • “Qishloq xo’jaligi mahsulotlarini tomorqada yetishtirish” loyihasi;
  • “Mobil qushxona yaratish” loyihasi;
  • “Universal  mobil qayta ishlash sexini ommalashtirish” loyihasi;
  • “Xalqaro akkreditatsiyaga ega oziq-ovqat mahsulotlari laboratoriyasi” loyihasi;
  •  “Yosh mutaxassislarni tayyorlash” loyihasi.

Yuqorida ta’kidlangan loyihalarning tavsifi haqida batafsil bilmoqchi bo’lsangiz, press-konferensiyaning savol-javob qismida to’liq ma’lumotlar berib o’tiladi.

O’zbekiston Oziq-ovqat sanoati uyushmasi bugungi kunda         

  • Germaniya Xalqaro hamkorlik jamiyati;
  • Hindiston savdo-sanoat palatalari;
  • Delovaya Rossiya tashkiloti;
  • Xalqaro Islom biznes assotsiatsiyasi;
  • Rossiya federatsiyasining eng yirik Lenta gipermarketlar tarmog’i;
  • Ulyanovsk va Yugra;
  • Mir Torgovli;
  • REGRAND kabi xalqaro tashkilotlar, shuningdek,
  • O’zbekiston Respublikasi Oliy Majlis SENATi;
  • O’zbekiston standartlashtirish, metrologiya va sertifikatlashtirish agentligi;
  • O’zbekiston Respublikasi Vazirlar Mahkamasi huzuridagi o’simlik karantini davlat inspeksiyasi;
  • O’zbekiston Respublikasi Sanitariya-epidemiologik osoyishtalik va jamoat salomatligi xizmati;
  • Davlat bojxona qo’mitasi;
  • Eksportni ragbatlantirish agentligi;
  • O’zbekiston Iqtisodiyot Assambleyasi;
  • “O’zbekiston Eksportchilari” uyushmasi;
  • “O’zbekiston Biznesni Rivojlantirish uyushmasi;
  •  AgroPromBirja;
  • O’zbekiston Respublikasi Tovar-xomashyo birjasi;
  • KAPITALBANK;
  •  AGROBANK;
  •  ASAKABANK;
  •  ALOQABANK;
  • O’zbekiston Kimyo-texnologiyalar universiteti;
  • Turin Politexnika Instituti;
  • O’zbekiston Respublikasi veterinariya va chorvachilikni rivojlantirish davlat qo’mitasi
  • O’zbekiston Asalarichilar uyushmasi kabi bir qator mahalliy tashkilotlar bilan hamkorlikda samarali faoliyat yuritib kelmoqda.

Hurmatli mehmonlar,

Xabaringiz bor, Prezidentimiz Shavkat Mirziyoyev tomonidan 2019-yil                           29-iyulda “Qishloq xoʻjaligi mahsulotlarini chuqur qayta ishlash va oziq-ovqat sanoatini yanada rivojlantirish boʻyicha qoʻshimcha chora-tadbirlar toʻgʻrisida” qaror imzolangan edi. Unga asosan, qishloq xoʻjaligi mahsulotlarini qayta ishlash boʻyicha 174 ta, oziq-ovqat sohasida import oʻrnini bosuvchi mahsulotlar ishlab chiqarish borasida 24 yirik investitsiya loyihasi amalga oshirilishi, meva-sabzavotchilikka ixtisoslashgan tumanlarda mavjud samarasiz bogʻlar oʻrnida             36 ming gektar intensiv bogʻlar barpo qilinishi rejalashtirilgandi. Uyushmaning tashkil etilishi yuqoridagi qarorning amaliyotda keng va samarali tatbiq qilinishiga ma’lum ma’noda yetakchi kuch bo’la oladi, desak adashmaymiz! Va uyushmamiz xodimlari bu borada samarali mehnat faoliyatini yuritib kelishayotganligini alohida faxr bilan ta’kidlab o’tamiz!

Azizlar,

Barchangizga press konferensiyaga kelganingiz uchun chuqur minnatdorchilik bildirgan holda o’z so’zimni yakunlayman! Va har biringizga sihat-salomatlik, ishlaringizga omad hamda muvaffaqiyatlar tilab qolaman!

E’tiboringiz uchun rahmat!

RUZ TRADER – Rossiya tijorat-taqsimot markazi hamda O‘zbekiston Oziq-ovqat sanoati uyushmasi o‘rtasida hamkorlik memorandumi imzolandi!

Oziq-ovqat sanoati uyushmasidan Bahodir Umirshayxov va RUZ TRADER tashkiloti tomonidan Mixail Panchenkov vakilligida imzolangan memorandum ikki mamlakat biznes tuzilmalari o‘rtasida yana-da yaqin savdo-iqtisodiy aloqalarni o‘rnatishni nazarda tutadi.

Memorandum doirasida ikki davlat tadbirkorlarining savdo va investitsiya faoliyatini qo‘llab-quvvatlash, mamlakatlarning iqtisodiyot va tashqi savdo, tashqi iqtisodiy aloqalar sohasidagi qonunchilik, qoidalari to‘g‘risida o‘zaro manfaatli maʼlumotlar almashinuvi yo‘lga qo‘yish rejalashtirilgan.

Shuningdek,O‘zbekiston-Rossiya ishbilarmon doira vakillari o‘rtasida yarmarka, ko‘rgazma, seminar, simpozium hamda konferensiyalar o‘tkazishni tashkillashtirish belgilangan.

Murojaat uchun:

+998997232111

+998712203313

+998985775353

O‘zbekiston Oziq-ovqat sanoati uyushmasi hamda Afg‘onistonning «Yellow Pages» tashkiloti o‘rtasida hamkorlik memorandumi imzolandi.

O‘zbekiston Oziq-ovqat sanoati uyushmasi hamda Afg‘onistonning «Yellow Pages» tashkiloti o‘rtasida hamkorlik memorandumi imzolandi.

Memorandum o‘z ichiga oziq-ovqat sanoati sohasida hamjihatlikda tadqiqotlar o‘tkazish, bozor va aholi ehtiyojlarini o‘rganish, o‘zbek-afg‘on tadbirkorlari o‘rtasida B2B uchrashuvlari, forum, konferensiya, ko‘rgazmalar o‘tkazishni qamrab oladi.

Shuningdek, memorandum doirasida ikki mamlakat o‘rtasida mahsulotlar eksportining samarali tarzda amalga oshirilishini taʼminlashga ko‘maklashish ham nazarda tutilgan.

Uchrashuvning natijasi o‘laroq, uyushmaning Xorijiy hamkorlarni jalb qilish va eksportga ko‘maklashish bo‘limi boshlig‘i Abdurahmonov Bahodir Abdumannonovich Afg‘oniston Islom Respublikasi bilan faoliyat olib boruvchi doimiy vakil sifatida tayinlandi.

Murojaat uchun:

+998997232111

+998712203313

Germaniyaning Xalqaro Hamkorlik Jamiyati ( GIZ ) GmbH bilan malakali kadrlar tayyorlash tizimi bo’yicha hamkorlik aloqalari yo’lga qo’yiladi!

“O’zbekiston Eksportchilari” hamda Oziq-ovqat sanoati uyushmasi rahbarlari Germaniya Xalqaro Hamkorlik Jamiyatining O’zbekistondagi vakolatxonasi mas’ul xodimi, «Markaziy Osiyoda kasb-hunar ta’limi» loyihasining milliy koordinatori Jahongir Jo’rayev bilan uchrashishdi.

Suhbat davomida o’rta maxsus ta’lim bosqichida o’qitilishi kerak bo’lgan yoshlarni ishlab chiqarish sohasida yetuk tajriba hamda nazariy bilimga ega kadr sifatida tayyorlash masalalari ko’rib chiqildi.

Uchrashuv so’ngida yuqorida ta’kidlangan yo’nalish bo’yicha tizimli tarzda o’qitish, shuningdek, o’qishning ilk kunidanoq ilm oluvchilarni amaliyot joyi hamda ish bilan ta’minlash masalalarini ishlab chiqishga kelishib olindi.

Qishloq xo’jaligi va oziq-ovqat sohasi iqtisodiyoti ilmiy-tadqiqot instituti bilan hamkorlik memorandum imzolandi.

O’zbekiston Oziq-ovqat sanoati uyushmasi hamda Qishloq xo’jaligi va oziq-ovqat sohasi iqtisodiyoti ilmiy-tadqiqot instituti o’rtasida o’zaro hamkorlik qilishni samarali yo’lga qo’yish maqsadida memorandum imzolandi.

Undan ko’zlangan asosiy maqsad Oziq-ovqat mahsulotlari yetishtirish va ishlab chiqarishni yanada rivojlantirish jarayonida yuzaga keladigan muammolarni o’rganish, tahlil qilish, ushbu sohada faoliyat yuritayotgan kichik biznes hamda xususiy tadbirkorlik subyektlarining huquqiy va iqtisodiy sharoitlarini yaxshilashga qaratilgan qonunchilik bazasini takomillashtirish bo’yicha taklif va tavsiyalarni ishlab chiqish hisoblanadi.

Oziq-ovqat sanoati uyushmasi raisi Bahodir Umirshayxovning ta’kidlashicha, memorandum doirasida Qishloq xo’jaligi mahsulotlarining ichki va tashqi bozorlarini o’rganish bo’yicha chuqur marketing tadqiqotlarini o’tkazish, buning asosida tarmoqni o’rta, shuningdek, uzoq muddatli istiqbolda rivojlantirish dasturlarini ishlab chiqish amalga oshiriladi.

Kodeks Alimentarius haqida bilasizmi?

Kodeks Alimentarius ( lotincha  “Codex Alimentarius”  – Oziq-ovqat kodeksi) – FAO / JSST Xalqaro oziq-ovqat standartlari va qoidalari kodeksini amalga oshirish bo’yicha  Xalqaro komissiya tomonidan qabul qilingan oziq-ovqat mahsulotlarining standartlari to’plami hisoblanadi. Kodeks standartlari asosiy oziq-ovqat mahsulotlari, qayta ishlangan ovqatlar, shuningdek, qayta ishlanmagan oziq-ovqat mahsulotlariga doir talablarni o’z ichiga oladi.

KODEKS ALIMENTARIUS xalqaro standartlari, ko’rsatmalari, qoidalari oziq-ovqat xavfsizligi va sifatini ta’minlashga yordam beradi, shuningdek, oziq-ovqat mahsulotlarining adolatli savdosini rivojlantirishga ko’maklashadi. Kodeks yordamida iste’molchilar sotib olgan oziq-ovqat mahsulotlarining xavfsizligi va sifatiga ishonch hosil qilishlari, import qiluvchilar buyurtma qilingan oziq-ovqat mahsulotlarining talab xususiyatlariga mos kelishiga amin bo’lishlari mumkin.Bir so’z bilan aytganda, Kodeks alimentarius har bir inson uchun hamma joyda xavfsiz va sifatli oziq-ovqat kafolati sanaladi.

Hozirda 215 ta tashkilot (hukumatlararo, nohukumat va BMT organlari) ushbu kodeksning kuzatuvchisi maqomiga ega hisoblanadi. 2012-yilda mazkur kodeks komissiyasi tarkibiga 186 mamlakat qatorida Yevropa Ittifoqi ham kirgan.

Tarixi

Kodeks Alimentarius komissiyasi 1963-yilda farmatsevtika sanoati ta’siri ostida tashkil etilgan.  Kodeks FAO konferensiyasining 1961-yildagi o’n birinchi sessiyasi va Jahon sog’liqni saqlash tashkilotining o’n oltinchi assambleyasida qabul qilingan qarorlarga muvofiq tuzilgan. Biroq Kodeks Alimentarius nomining tarixiy ildizlari “Alimentarius Austriacus Codexdan” olingan sanaladi(bu 1897-yildan 1911-yilgacha bo’lgan davrda Avstriya-Vengriya imperiyasida ishlab chiqarilgan ko’plab oziq-ovqat mahsulotlarining standartlari va tavsiflari to’plamining nomi). 

Qo’llanish doirasi

Kodeks barcha oziq-ovqat mahsulotlari: ham qayta ishlangan, ham xomashyo mahsulotlarini tartibga soladi. Ushbu kodeks mahsulotlarning ayrim turlari uchun standartlardan tashqari mahsulotni etiketkalash, oziq-ovqat gigiyenasi, qo’shimchalari, xavfsizligi, biotexnologiyasini o’rganish qoidalarini tartibga soluvchi umumiy standartlarni o’z ichiga oladi.

Kodeks bir nechta tillarda nashr etilgan: ingliz, fransuz, ispan. Kodeksga kiritilgan ba’zi standartlar rus va arab tillarida ham mavjud; ba’zi standartlar xitoy tiliga tarjima qilingan. 

Kodeks quyidagilarni tartibga soladi:

  • oziq-ovqat mahsulotlarini markalash (umumiy qoidalar, ovqatlanish bo’yicha korsatmalar, dastur ko’rsatmalari);
  • oziq-ovqat qo’shimchalari (asosiy standartlar, foydalanish qoidalari, oziq-ovqatda ishlatiladigan kimyoviy moddalarga talablar);
  • oziq-ovqatning ifloslanishi (umumiy talablar, oziq-ovqat mahsulotlarining radionuklidlar , alfa hamda boshqa mikotoksinlar bilan ifloslanishining chegara darajasi va boshqalar);
  • pestitsidlar va veterinariya dori-darmonlarining oziq-ovqat tarkibidagi ruxsat etilgan maksimal darajasi;
  • biotexnologik xatarlarni baholash yo’llari;
  • oziq-ovqat mahsulotlarini ishlab chiqarishdagi gigiyenik talablar;
  • tahlil qilish usullari va namunalarni tanlash.

Kodeks doirasida ushbu turdagi oziq-ovqat mahsulotlari uchun maxsus standartlar mavjud:

  • Go’sht va go’sht mahsulotlari;
  • Baliq va baliq mahsulotlari;
  • Sut va sut mahsulotlari;
  • Maxsus parhezlar uchun oziq-ovqat, shu jumladan, chaqaloqlar va bolalar uchun oziq-ovqat mahsulotlari retsepti;
  • Yangi va qayta ishlangan sabzavotlar, mevalar, sharbatlar;
  • Donli va dukkakli ekinlar hamda ulardan olinadigan mahsulotlar;
  • Yog’lar va yog’ mahsulotlari;
  • Turli xil oziq-ovqat mahsulotlari (shokolad, shakar, asal, mineral suv va boshqalar).

Iste’molchilarning sog’lig’ini himoya qilish

Aholining oziq-ovqat xavfsizligi bilan bog’liq tashvishlari, ko’pincha, Kodeksni global muhokamalar markaziga aylantiradi. Veterinariya dori vositalari, zararkunandalarga qarshi vositalar, oziq-ovqat qo’shimchalari va ifloslantiruvchi moddalar – bu Kodeks yig’ilishlarida muhokama qilinadgan ba’zi mavzular hisoblanadi. Kodeks standartlari mustaqil xalqaro xatarlarni baholash organlari yoki FAO va JSST tomonidan tashkil etilgan maxsus konsultatsiyalar orqali taqdim etilgan ishonchli ilmiy dalillarga asoslangan sanaladi.

Savdodagi to’siqlarni olib tashlash

Butunjahon savdo tashkilotining “Sanitariya va fitosanitariya chora-tadbirlari to’g’risida”gi bitimi(SPS) da keltirilishicha, oziq-ovqat xavfsizligi bo’yicha Kodeks standartlariga havola qilish Kodeksning savdo ziddiyatlarini hal qilishda muhim ro’l o’ynaganligini ko’rsatadi. 1963-yilda tashkil etilganidan beri Kodeks tizimi yangi muammolarga javoban ochiq va ishtirokchan shaklda rivojlanib kelmoqda. 

Kodeks standartlarining mohiyati

Kodeks standartlari va tegishli matnlarida iste’molchiga asl mahsulotni aralashmalarsiz, yuqori sifatli, tabiiy tarzda tayyorlashga doir talablar mavjud. Har qanday oziq-ovqat mahsuloti yoki mahsulot guruhi uchun kodeks standarti Kodeks tovar standartlari formatiga muvofiq ishlab chiqilishi va shunga mos tarzda unda keltirilgan bo’limlarni o’z ichiga olishi kerak.

Kodeks standartlarini qayta ko’rib chiqish

Kodeks Alimentarius komissiyasi va uning yordamchi organlari, agar kerak bo’lsa, Kodeks standartlari va tegishli matnlariga hozirgi ilmiy bilimlarga va boshqa tegishli ma’lumotlarga muvofiqlashtirish uchun o’zgartirishlar kiritishi yoki bekor mumkin. Huqiqiy jihatdan Kodeks Alimentarius komissiyasining har bir a’zosi mavjud bo’lgan Kodeks standartlariga yoki tegishli matnlarga o’zgartirishlar kiritishni talab qilishi mumkin bo’lgan yangi ilmiy va boshqa tegishli ma’lumotlarni aniqlash hamda tegishli Qo’mitaga taqdim etish uchun javobgardir.

Bojxona xizmati

Hurmatli tadbirkorlar!

O‘zbekiston Oziq-ovqat sanoati uyushmasi 5 iyul sanasidan 5 avgust sanasiga qadar Bojxona sohasiga doir xizmatlarni 15% chegirma asosida taqdim etadi!

Xizmat o‘z ichiga quyidagilarni qamrab oladi:

– Bojxona chegaralarida hujjatlarini rasmiylashtirishga amaliy yordam berish;

– Mahsulot va xomashyo kodlari hamda davlat to‘lovlarini aniqlashtirishda ko‘maklashish.

Bojxona xizmatlaridan chegirma asosida foydalanishni istrasangiz, quyidagi raqamlarga murojaat eting:

+998997232111

+998712203313

Farg‘ona 450 ming AQSH dollaridan ziyodga qulupnay eksport qilindi

2021 yilning birinchi yarmida Farg‘ona viloyatidan qiymati 450 ming AQSH dollari bo‘lgan 153 tonna qulupnay eksport qilindi.

Eksport Rossiya, Qirg‘iziston va Qozog‘iston kabi davlatlarga amalga oshirildi.

2020 yilda esa Farg‘ona viloyatidan qiymati 225 ming AQSH dollari bo‘lgan 115 tonna qulupnay Qirg‘iziston, Qozog‘iston hamda Rossiya davlatlariga eksport qilingan.

Maʼlumot uchun, qulupnaylarning tez buziluvchanligini hisobga olgan holda, uning bojxona nazorati va rasmiylashtiruv jarayonlari soddalashtirilgan tartibda, tezkorlik bilan yo‘lga qo‘yilishi taʼminlangan.

Murojaat uchun:

+998997232111

+998712203313

Malayziya Palma yog‘i Kengashi(MPOC) bilan video-konferensiya bo‘lib o‘tdi

O‘zbekistonning Malayziyadagi elchixonasi, Malayziya Palma yog‘i Kengashi(MPOC) hamda O‘zbekiston Oziq-ovqat sanoati uyushmasi o‘rtasida videokonferensiya tashkil etildi.

Masofaviy muloqot davomida Malayziyadan O‘zbekistonga palma yog‘i importi hajmini oshirish, mavjud kamchiliklarga hamkorlikda yechim topish masalalari ko‘rib chiqildi.

Uchrashuvda uyushma xodimlari tomonidan mamlakatimizdagi qishloq xo‘jaligi ekinlarini xalqaro sifat standartlari asosida qayta ishlash hajmini oshirish, shuningdek, ichki va tashqi bozorlarda raqobatbardosh oziq-ovqat mahsulotlarini ishlab chiqarishga qaratilgan chora-tadbirlar to‘g‘risida batafsil maʼlumot berildi.

Tadbirning samarasi o‘laroq, Malayziya palma yog‘i Kengashi vakillari va uning aʼzolarini O‘zbekistonda tashkil etiladigan B2B uchrashuvlari, ko‘rgazmalarga jalb etishga kelishib olindi.

Video-konferensiya O‘zbekistonning Malayziyadagi elchixonasi yordamida tashkil etildi. Ko‘mak uchun Oziq-ovqat sanoati uyushmasi jamoasi elchi janoblari Ravshan Usmonovga o‘z samimiy minnatdorchiligini bildirib o‘tadi.

Davra suhbati

Qandolat mahsulotlari ishlab chiqaruvchilari diqqatiga!

O‘zbekiston Respublikasi Prezidentining 2021 yil 2 iyundagi «Texnik jihatdan tartibga solish sohasida davlat boshqaruvini tubdan takomillashtirish to‘g‘risida”gi PF-6240-son Farmoniga binoan Texnik jihatdan tartibga solish agentligi faoliyati yo‘lga qo‘yildi.

12 iyun kuni Oziq-ovqat sanoati uyushmasida mazkur tashkilot direktori Dilshod Sattorov bilan davra suhbati bo‘lib o‘tdi.

Uning taʼkidlashicha, qandolatchilik mahsulotlariga yangi davlat standartlari joriy etilgan.

2021 yil 1 sentyabrdan yangi standart talablari bo‘yicha isteʼmol bozorlarini nazorat qilish boshlanadi.

Ishlab chiqarish jarayonini yangi standartlarga moslashtirishni tadbirkorlarga tushuntirish maqsadida 17 iyun kuni yig‘ilish bo‘lib o‘tadi.

Unda ishtirok etishga barchani taklif etamiz!
Manzil: Metrologiya ilmiy-tadqiqot instituti

Ushbu turdagi tadbirlar iyun oyi davomida go‘sht va sut mahsulotlari, quruq meva ishlab chiqaruvchi tadbirkorlar uchun ham o‘tkaziladi. Uchrashuv xabarlari rasmiy kanallarimizda eʼlon qilib boriladi.

Iste'mol savatchasi: Mandarin USD 1.35 ~ 1/KG; Limon USD 0.85 ~ 2.14/KG; Avokado USD 0.99 ~ 4.14/KG; Mango USD 0.78 ~ 5.50/KG; Banan USD 0.42 ~ 1.11/KG

Translate »